Eusi Gschicht
Liebi fangt immer
mitere einzigartige Gschicht a
Menu
Bim erste Date sind mir uf en Spaziergang und aschlüssend ufen Kaffi in Klote, bimene Schwiizerreisli hend mir üs besser kenneglernt. Es Highlight isch au s’Schlittschüele bim Dolder gsi. Mir tüend gern käffele, pöstele, reise, sind gern underwegs & dihei, hend de glich Humor & de glich Gschmack. Schnell isch klar gsi, dass mier beidi gern tüend Reise und die Liideschaft teiled mer so oft mer chönd.
Mer händ gmeinsam scho vieli schöni Egge vo dere Wält dörfe bereise. De nahi Oste, id Wüeschti im Oman, Inselfeeling uf Santorini, Schneegestöber im Norde vo Schwede, en chüeli Briise ide Schwiizer Berge, heissi Summertäg am Meer oder am See, Wandere ide Bärge, und no vieles mehr. Die Wält isch eifach so gross, dass mer vom Reise eifach nie gnueg bechömed. Zwiifelsohni hed das au mit de Delia ihrere bruefliche Vergangeheit als Flight Attendant ztue. Au de Roger isch scho immer es Reisefüdli gsi und hed scho vieli Plätzli uf dere Wält gseh. Nume logisch, dass die Gmeinsamkeit eus no änger zämegschweist hed. Mer gnüssed sowohl kulturelli Momänt als au Gnüsserziite bi feinem Ässe, eme Gläsli Wii oder eifach mal es chüels Bierli am Strand.
Nachere wunderschöne Wüeschtereis dur de Oman mit Jeep und viel Sand simmer ime Hotel wie us Tuusig und ei Nacht aacho. Dete hed de Roger die Frage der Fragen gstellt und natürlich hed Delia sofort JA gseid.
Sie isch de Ruhepol im Team. Ufgstellt und begeischterigsfähig haltet sie locker mit em Roger sinere Pace mit. Sie isch gern verusse, erläbt gern Neus und natürlich isch Sie es Reisefüdli. Deheime Düümli treie isch ned ihres Ding. Sie Macht alles mit und probiert neui Sache us. Sogar die erschte Versüech als Hockeyanerin hed sie scho hinder sich.
En Lebemann wie er im Bilderbuech stahd. Mit ihm wirds nie langwiilig. Er hed ständig Ideeä was mer alles chönti unternäh. Stillsitze isch ned so sis Ding. Er hets lieber wenn öppis lauft und er öppis chan erläbe. Er isch immer beschtens usgrüschtet für sini Unternähmige und lahd sich sälte de Honig vom Brot näh 🙂
